Döt le bun a ”La Spona”
Tl salf laur protezioné ”La Spona” da Pidrô él gnü tigní ai 10 de ma 2017 la festa por i 30 agn de vita. Na festa plajora, sinziera y de buna vëia.
Pordërt foss le 30ejim compliann d’La Spona tomé bele dl 2016, mo deache al é l’ann passé sté de gran mudaziuns tla coordinaziun, án tut la dezijiun da la fá iniann. Chësc é sozedü le mercui ai 10 de ma 2017. La direziun, assistënc y assistis á por l’ocajiun arjigné ca na festa plajora, che ne dê nia ma avëi sü momënc ofiziai, mo ince ester n de dla porta daverta, olache la jënt á albü la poscibilité da cuché ite ti salf de laur y de vita di assistis. La responsabla Sabine Federa á podü saludé na linia de ghesć. Danter chisc le presidënt dla Comunité de Val de Puster Roland Grießmair, le diretur di Sorvisc Soziai dla Comunité de Val Gebhard Mair, l’ombolt de ciasa Angel Miribung, i ombolc de Badia y San Martin, resp. Iaco Frenademetz y Heinz Videsott, colegs y assistis di atri salfs de laur protezioné de Puster y - chësc le plü important - n gran numer de porsones che á mostré respet y aprijamënt por le laur che vëgn fat de por de dai y cun i assistis. Nia inultima á tut pert ince Konrad Comploi, che é sté manajadú dal mëteman incá cina l’ann passé. Ël é gnü definí ”le pere” d’La Spona, por la gran dediziun che al á porté ite tla strotöra, bëgn sura le dovëi aministratif fora. Ël á ince cunté en cört la storia de chisc 30 agn, da olache an é passá da n cer’ ”desprisc” cina al’azentanza y integraziun plëna dla strotöra y chi che l’abitëia. Tema dla festa ê i cater elemënc tera, füch, ega y aria, sön chi che la festa é gnüda strotorada, y ince le pice teater che i assistis á imparé ite cun Erika Castlunger.
Tut fora dala Usc di Ladins
Novité tla Ciasa "La Spona" a Pidrô
Tla ciasa "La Spona" unse arjigné ite na picia botëga por mëter fora da
vëne i produc co vëgn fac dai assistis.
I sëis bel inviá da gní a nes ciafé y conjidré la botëga.
L'orar dla botëga é:
danmisdé | domisdé | |
|---|---|---|
lönesc - jöbia: | 08.00 - 11.45 | 13.00 - 15.00 |
vëndres: | 08.00 - 11.45 | stlüt |
|
|
Inovaziun dla tecnica
Por Andrè se à realisé n som, al se à arjigné n scagn a rodes motorisé nü. Cun chësc al na gran ligrëza, ciodì che al pò se armöie sënza le aiüt de atri.
Produziun nöia
Dal altonn 2014 inant pita La Spona n produt nü. Dô che al é gnü arjigné na ćialdira da dlighé cëra y na pićera pressa da fracé adüm ziples pò le salf de laûr La Spona fà les flameles por impié sö le füch. Chëstes é dër comotes por impié sö le füch da scialdè la stüa mo inće te ćiasadafüch. Ales ne tofa nia sciöch’ les tradizionales flameles che an ciafa te vigni botëga y le prisc é plö o manco le medemo de 0,05 € al tòch. Al vëgn inće pité de pićera lëgna sfnüda sö te sać da 3 kg por impié sö plö saurì le gran füch al prisc de 3,50 € le sach. Gnide a se ciafè y a ciarè chestes novites.
Chi che éss vedles ćiandëres meses adurades podess da śëgn inant les dè jö te salf de laûr protezionè a Pidrô.
- Günther stlapa sö lëgna
- Daniel fej flameles
Colaoradù volontar
Giorgio, nosc colaoradù volontar, che dëida fora regolarmënter n valgügn dis al edema te nosta strotöra.
L’ “Oldtimer-club” dla Val de Puster è gnü a nes ciafè cun n scech
En vëndres, ai 07 de otober, él rovè adalerch te nosta strotöra le presidënt y n mëmber dl “Oldtimer-club” dla Val de Puster por nes sorandè n scech de 885,00 Euro. Cun chisc scioldi podunse arjigné na televijiun nöia por le Salf de laûr.
Da pert de düć chi dla Spona dër n bel giulan al “Oldtimer-club” dla Val de Puster por la gran spënora che ài nes à fat!
Na bela scincunda da pert dla cassa Raiffeisen Val Badia a düć chi dla Spona
Ai 27 de novëmber 2012 ti él gnü sorandè al manajadù dla Spona Konrad Comploi, da pert dl rapresentant dla cassa Raiffeisen Sepl Pezzei, n aparat da fà jö nü dla marca Panasonic Lumix DMC-TZ25. De chësc aparat n jêl debojëgn por podëi documentè cun retrać düć i momënć importanć y les ativitês particolares che vëgn vites y fates te chësta strotöra.
Düć nos dla Spona rengraziun de cör la Cassa Raiffeisen dla Val Badia por süa man dagnëra daverta a nösc debojëgns.
Lié libri, na nöia ativité de laûr a „La Spona“
Bele dan valgügn agn êl gnü ponsè da daurì na nöia ativité tla strotöra „La Spona“, chëla da lié libri. Tla comunité comprensoriala dla Val de Puster n êl cina ciamò degügn che pitâ chësc sorvisc. Dal 2012 éla tan inant, al é gnü arjigné n valgünes mascinns por podëi mëte man chësc laûr. N maester da lié libri é gnü te nosta strotöra a se mostrè y a se insigné les tecniches por lié libri. Düć chi che à interesc da se lascè lié sföisc da scora o teses de laurea, à da śëgn inant la poscibilité da gnì te nosta strotöra a se lascè fà chësc laûr.
