Mike en ël da la Nigeria, che da püch tëmp vir a La Val y laora al mumënt te nosta strotöra sciöche vardian, se á fat la proposta de se insigné da suné le tambürl sciöche ai le fej tal Africa.

Nos un atira dit de sce y i ne udon nia l' ora da mët man. Incö el spo gnü le gran dé y sun jüs düc adüm te palestra olache Mike se aspetâ bel, cun i tambürli arjigná ca. Dan mat man se ha Mike splighé de ci material che en tambürl african é fat, al é fat de pel de biscia o de tigra. Dedô unse metü man da suné le tambürl adüm cun Mike, chël ê dër da ri. A la fin a Mike ciamó suné y cianté pur nos y nos un pudü balé ai sonns di ritms africans. Al é sté en domisdé atramënter co i atri, da ri y nos un indô imparé val da nü. Iolan Mike.

Rossana Todesco dl lüch da Murin de Pedraces, se á invié a sté cun ëra n dé söl lüch de familia. Deache nos un düc dër ligrëza cui i tiers unse atira dit de sce, sënza punsé sura dui iadi. Canche sun ruvá söl lüch se aspetâ Rossana y n grüm de pici iac de püces edemes, chisc ê tan da urëi bun che ti sun atira düc jüs pormez a ti fá aicia. Canche Rosanna ê indô stata bona da avëi nosta atenziun, se ala mené a ciaré la stala olache ai á les vaces. Ëra se a cunté en grüm de cosses sura les vaces, da -sciöche al funziona le magun de na vacia- cina a -tan de lat che ala po dé ten de- y un ince pudü pié tles mans n corn y ciaré avisa schiöche al é fat. Dedô sunse jüs ten n ater local dla stala olache, al fô de pici cunici, a chisc anse podü ti dé da mangé tratan che Rossana se spligâ de plü cosses sura i cunici. Un ince podü ti fá aicia, mo purmó do che ala se á splighé sciöche an mëss fá. Ala se á insigné da respeté i tiers, sciöche an i pëia ite y olache ai ne ó nia gní piá ite y sciöche an se comporta cun i tiers. Canche gnen fora de stala el na gran alcia che se aspetâ, an és orü dí che ala oress se salté ite, al se é gnü spligé spo che la mandla ê tl laûr da coé fora y le mandel mëss defëne la cô. Dailó dlungia êl na gran gabia, olache al é de vigni sort de iarines, al se é gnü spligé che les iarines é i tiers che vir ciamó aldédaincö, che ti somëia le plö ai dinosaurs. Un de nos á albü le coraje da tó na iarina söl brac y düc un podü purvé tan morjela che na iarina é. Dô che an odü la stala y düc i tiers, se á Rossana ciamó invié te ciasa a mangié na turta che ëra á arjigné por nos. Te chëla ocajiun ala dit de avëi le dejider, da fá en proiet cun nos dla Spona plö inant. A nos se plej l' idea dër y ne odun nia l' ora da mët man. Intratan orunse to l' ocajiun da ringrazié Rossana pur le bel de che ëra á organisé pur nos.

 Ai 26 de jené 2016 él gnü motü a jí tla ciasa na proa de evacuaziun cun les uniuns di stödafüch da La Val, Badia, San Martin y Al Plan. I assistis se á dër conforté a chësta proa y ne aspetâ nia l´ora de podëi fà para. Al é gnü simulé en mé de füch tla strutüra, olach´le füm se tirâ sö pur stiga y ti porti. I assistis y l´ assistënta che ê tla prüma alzada é gnüs alzà da sorà jö cun la litra di stödafüch d´ Al Plan. Un n assistì é gnü portè söl scagn a rodes jö pur la stiga de emergënza. I assistis y l´ assistënta che ê tla secunda alzada é gnüs acompagnà dai stödafüch jö pur stiga. Ai assistis ti al salpü dër bel, ai ne â nia tëma, ince sce al ê scür y da füm y sce i stödafüch rodâ te ciasa cun la mascora cuntra l´füm. Chësc é desigü sté le mirit di stüdafüch, che á salpü da ti stè pormez y ti trasmëte sicurëza y calma.I oressun rengrazié vigni stüdafüch por la bela proa che ai s' á tut la bria da fà y pur le tëmp che vignun ofrësc sö pur daidè i atri, ince meton val iade te prigo süa vita.

L´idea de Michil Costa da mët a jí n proiet in colaboraziun cun le personal dl hotel La Perla y dles assistëntes dla comunité d´abitaziun por inserí Astrid sciöche colaboradëssa tl hotel é stada n gran suzés. Astrid á motü man tla reception y é spo passada a daidé te botëga, te stüa da gosté, tles stües dl restaurant fina a daidé fá la decoraziun por le hotel. Al ti á salpü dlunch dër bel, ara é gnüda tuta sö dër bun y le personal á mostré tröpa paziënza dala insigné jö. Dandadüt Valerio Cabiddu che se á motü a desposiziun da fá da porsona de riferimënt a Astrid tratan chësc tëmp, ti á insigné dër tröp y á inće sostegnü les assistëntes pro l´educaziun d´Astrid. Iö á baié cun i colaboradús dl hotel y vignun á dit che Astrid ti á dé tröp. Ara ê buna da trasmëte a düc la buna lüna. Astrid ti á insigné da se tó tëmp y da ester cuntënc. Astrid ê dër brauia da cunté a sü compagns d’La Spona ci che ëra â fat ia pur le dé te hotel y tan tröp ch’ara â laoré. Ëi ê propi n pü invidiusc, ince ëi ess orü fá chësc laur y un o l´ater aspetâ ince ch’ara fajess n fal, por podëi spo tó ite so post. Al é sté na sort de gara che á stimolé la motivaziun de Astrid y ince di atri assistís. Chësc proiet a dé tröp a düc chi che á fat para. Astrid á sëgn motü man n laur nü. Ara laora tl restorant La Ciasota a Pidrô. Astrid á fat le prüm vare y al foss bel sce ince n ater assitënt o n’ atra assistënta podess fá na te bela esperiënza.

La familia Costa dl Hotel La Perla a Corvara nes à invié a balè al Apresski L´Murin y dedô a cëna tl bistrot dl hotel. L´emoziun ê tan grana che i assistis â bel metü man da se arjigné dales cater domisdé. I ëi s’à düć vistì la ćiamëja y la cravata, Astrid s’à vistì en bel guant y s’ à inće lascè depënje sö. Da mesa les sis sunse spo ruvà al Murin olache s´un devertì y un balè adüm cun val’ colaboradú dl hotel che é gnü a nes saludé. Inće Matthias l´proprietar, é stè cun nos por en pez y à balè cun i assistis. En valgügn assistis é inće jüs sön mësa a balè do che en chelner ti á fat la proposta. Dales set sunse spo jüs al bistrot olache un ciafè na bunisciama cëna, le personal ê dër da urëi bun cun nos y val’ un se fermâ inće a sla cuntè cun nos. Dô cëna s’à Astrid adüm cun Lisa y Michil lascè udëi la ćiasa, suradüt i posć olache ëra á laurè tratan chësta saison. Mo denat che mët man la roda, sunse jüs te ćiasadafüch a saludé y rengrazié i coghi por la buniscima cëna. Astrid s’à spo lascè udëi la butëga, les sales dl restaurant, la sala di gustá, l’area dl wellness y la cianô dai vins. Te cianô dai vins s’á lascé udëi n ater assistí le dessëgn che ël à fat sö por mür dan da en valgügn agn, tratan dn projet danter l´ hotel y nosta strotöra. Dô che ti un ćiarè a düć i seturs y saludé i colaboradus, él gnü ora da jì indô de revers da ćiasa. I oressun ćiamò en iade tó l´ocajiun da rengrazie la familia Costa por chësta magnifica sërada.

In jöbia ai 5 de forà sunse nos dl´abitaziun jüs a fà na jita cun les ćiaspes. Sun pià ia dales trëi cuntra Jú (San Martin) . Düć i assistis ê dër emozionà ćiodî che degügn n´ê mai jüs cun les ćiaspes denant. L´ tëmp n´ê nia le plü bel mo chësc ne ti à nia tut la vöia da jì ai assistis. A San Martin s´unse incuntè cun l´accompagandù Christoph Alfreider, che à organisé la jita pur nos. Bel da se vistì les ćiaspes éra stada dër da rì, deache an ne capî nia dër sciöch´an messâ fà y avëi les ćiaspes ti pîsc ê tl prüm inće en püch feter. Spo sunse pià ia, y al n´é stè degügn che à albü de gran problems da jì cun les ćiaspes tl pé, val’ un jê n pü' plü plan deache al manćiâ l’ alenamënt y d’atri jê indô bindebò debota. Le prüm toch ê en pü´ërt, dailò se fajôn plü fadia, mo spo sunse rovà t’en post da plan olache la nëi ê sciöche n polber y dailò êl dër saurì da jì . Dedô sun pià fora pur le bosch olache un udü en grüm de pedies de devigni sort de tiers y Christoph se spligâ de ci tier che ares ê. Ala fin sunse spo jüs te na ütia a bëre na ciuchelada ćialda y a mangé en toch de turta, che s´ ân sambëgn mirité dô na te fadia. Canche pian ia cuntra ćiasa sciacarâ val’ un bele pur podëi ćiamó en iade fà na jita cun les ćiaspes. I oressun ćtó l´ ocajiun da rengrazié Christoph pur la bela jita che un podü fà y i sperun che ara vais da n’en fà ćiamò üna.

 Ai 26 de jügn dl 2014, na jöbia domisdé, é le grup dl´abitaziun d’La Spona jü cun sües assistëntes a Asslach (A) a ti ćiaré al zoo, co é plü avisa sön la „Pustertaler Höhenstrsasse“. Dal mumënt che le zoo é dlungia Lienz, y al n´é nia lunć da jí, êl la meta ideala pur fà na gita de mez n dé. Le zoo ti á salpü dër bel a düć, suradüt deach’al n´é nia n zoo schiöch´ düć i atri, olache i tiers é sará ite tles gabies. Te chësc zoo po la maiù pert di tiers rodè lëdi. Porchël pon inće ti dè da mangé ai tiers y i pié ite y chësc ne pon sënza nia fà te n zoo. Chilò à i assistis albü la poscibilité da tó sö contat cun i tiers y da ti ji dër pormez. La strada fora por le zoo ê düta adërta sö, purchël unse inće fat n pü’ de alenamënt, che a valgügn ti à salpü dër bel y a d’atri n pü’ demanco. Sö insom al zoo êl na tor panoramica, con na beliscima odüda. La maiù pert di asssistis, chi manco stanć, é ciamò jüs sö a ćiarè jö.

Podëi stè tan dlungia i tiers, ji a pe fora por la natüra é dagnëra val’ che fej bun a corp y anima y dà sensaziuns positives. Porchël é stè chësc dër n bel dé por düt le grup.

In lünesc, ai 04 de furá, é gnü le grup de abitaziun invié a cëna al „Sciadá“ a Calfosch, i assistis y les assistëntes á atira azetè le invit cun ligrëza. Dô la buna cëna, êl na bela festa sön pista organisada da la scola de schi da Calfosch, olà che inće i assistis e les assitentes á podü fá para. Düta la pista ê iluminada y al ê ince en DJ che fistidiâ pur la müjiga. I mestri de schi é sta dër disponibli y ti á lascè fá ai assistis döes rodes con la ferata dla scola de schi. Chësc é sambëgn ste dër bel y interessant pur i assistis che n´ê ćiamo mai jüs cun na te ferata. Do les rodes cun la ferata esi spo jüs düć adüm a se bëre en tê ćialt pur se scialdè. Sö la pista êl spo inće en gran trampolin olà che i assistis é sta dër dî a saltè y s´á dër devertì. Dô i salć sön le trampolin âi ciamò fat na pićera spazirada sön pista, mo spò él tosc stè da jí a ćiasa deache le dé dô êl indô da jí a laurè. Uressun ćiamo tó l´ ocajiun da rengrazié la Valeria por la bona cëna y la scola de schi pur süa disponibilité y por les rodes cun la ferata.

Ai 4 de dezëmber 2012, á le Sorvisc ai jogn Val Badia invié le grup d´abitaziun a ciare ala mostra “Vire la Bibia”. La mostra ti á salpü dër bela a düć i assistis, dandadüt deach´al n´ê nia la solita mostra olach´an pò ma ćiarè ales cosses. Al ê na mostra che an á podü vire con düć i sëns. Al ê de vigne sort d´erbes ch´an podô tofè, erbes che chersciô bel ai tëmps de Gejú, tröpes ilustraziuns da odëi y tröpes cosses ch´an podô pié ite fora de vigni religiun . Verena Obojes che nes à invié ala mostra, s´á inće tut le tëmp, da nes splighé düta la mostra y ti á dè la poscibilité ai assistis da se vistì so guanć da curat y turbanć arabi. Chësc ti á salpü val' dër de interessant ai assistis, podëi en iade se sintì sciöche n curat o n rabin. Ala fin dla mostra él ciamò de vigni sort de jüć d´abilité da fà, che tratâ de religun o dla manira de vire ai tëmps de Gejú.

Pur stlü jö uressun ćiamò tó l´ocajiun da rengrazié la Verena por nes avëi invié y por s´avëi splighé de vigne sort tratan la mostra.

 Jì d´invern a „La Munt“ a balè é gnüda na tradiziun pur i assistis dl´abitaziun „La Spona“. Sciöche a düc i jogn, ti plej inće ad ëi le divertimënt, y da stè adüm cun i atri. Ai assistis ti plej dër la musiga popolara y porchël se conforti bel danperfora da jì dui iadi al mëis sö „La Munt“ pur ascutè sö, ciantè para y pur balè düt ci che ara và. Chësta é na poscibilité da imparè a cunësce indô d` atra jënt. Ai se sënt bun sce ai vëgn tuć sö y azetà dai atri o sce valgügn baia cun ëi y ne fej desgunes desfarënzies: Sambëgn plü bel él ćiamò sce valgünes và a balè impara. Düt chësc ti dà motivaziuns y vanité che e dër importantes pur so svilup. Les assistëntes y i assistis amirëia düc chi che se da jö cun ëi.

 En bel giulan ai chefs y al personal co sa dangara traté dër bun.