Proiet „Les 15 staziuns“ cun Irina Tavella

Irina laora cun l’arjila y â bel da tëmp le dejidêr de fà les staziuns adöm a jënt particolara. Ëra à invié n grup de sis assistis dla Spona y n grup de ëres dla Val Badia a fà para chësc proiet. Te na pröma incuntada, ai 27 de forà 2015, ti él gnü splighé a nösc assistis chësc proiet y vignun podô se chirì fora na staziun che ti plajô le plö. Atira ài spò mëtü man da laorè cun l’arjila, sënza avëi tëmes o pisimes, vignun savô ci che ël orô fà. Te na secunda incuntada ài depënt y rové spò süa staziun.

 

Por dè valüta a chësc proiet él gnü organisé ai 26 de merz 2015 a La Spona n domisdé de meditaziun, olache les staziuns é gnüdes metüdes fora por che la jënt podess les amiré. Te chësta ocajiun é les staziuns gnüdes spligades, meditades y Siur Heinrich Perathoner les à benedides.

Walter Bortolon y la competënza di movimënć (proiet 2012/13)

Walter Bortolon, espert de chinaestetica, é gnü plö iadi te nosta strotöra por se mostrè les set posiziuns de basa por se möie da na posiziun al'atra sënza messëi sforzé l'corp. Vigni assistì y assistënt à podü tó pert a chëstes leziuns. Por plö tëmp à vigni grup (tistlaria, tiesciaria, stüa da cujì y inće Madeleine) fat inant i eserzizi che Bortolon s'à ensigné. Al se tratâ da pié ia da na posiziun da impé por rovè jö cina  ia por tera ponüs y spò indô lovè sö. Döt chësc rodan l'corp sciöch' n torco y sënza sforzè l'spiné.

 

Terapia dl bal

Tratan mi agn de stüde a Torino ài fat na scora de trëi agn por la terapia dl bal y dl êrt a Milan. La metoda insignada te chësta scora é chëla de Maria Fux, na balarina y terapeuta dl bal dl Argentina. Düta la metoda se basëia sön l’eros y al é dër important de ne iudiché nia i movimënć dles porsones, mo dai osservè cun n comportamënt de amur. A chësta moda él por düć plö saurì da se möie y da ruvé en contat cun sò corp. Maria Fux é dla minunga che l corp n é nia bun da mintì. A chësta manira é vigni movimënt n espresciun che vëgn dal daìte dla porsona y chësc fej l lingaz dl corp sinzier y dërt, deplö co chël verbal. La terapia dl bal daida a fà gnì fora ci che un sënt daìte. Chi che tol pert a na terapia dl bal impara a se conësce damì instësc y aumentè de cotan sò bëgn psico-fisich.
Tratan mi practicum a La Spona ài albü la poscibilité de tignì regolarmënter incuntades de terapia dl bal cun i assistis. Tl scomenciamënt â i assistis dificulté da se daurì y da se concentrè sön sò movimënć y sön la musiga, ciodì che ài se lasciâ atira trà fora da mè o dai atri. Dô en valgünes incuntades, canch’ai savô de ci che ala se tratâ, se ài dër mioré y inće mia presënza ne i desturbâ nia. Tles ultimes incuntades ài podü osservè tan plö lëdi che i assistis ê bogn da se möie y tan de movimënć nüs che ài é bogn da fà.
I ringraziëii dër bel La Spona che i à podü portè ìte te mi practicum la terapia dl bal, a chësta manira ài iö podü imparè tröp y emplö ài aumentè mia esperiënza sön chësc ćiamp.

Sarah Falkensteiner                                                 (La Spona 2012)



 

Cursc de pilates

Tratan l’aisciöda 2010 él gnü organisé n proiet por mioré la posiziun dl corp di assistis. La maestra de educaziun fisica Verena Pedevilla à tignì 8 leziuns de pilates tla palestra dla Spona. Chëstes leziuns gnê tignides le mercui domisdé y durâ na bona ora. An pò dì che i assistis ê interscià ala cossa y che ài se porvâ dassën inće sce val'movimënt n ê nia saurì da fà y ti fajô mè da tignì fora. Chësc proiet foss dessigü dërt da fà ciamò n iade.                                                       

te palestra
 

Fi d'orientamënt La Spona

Botëga nöia tla ciasa "La Spona"