Gara dles liöses a Terenten

Le mertesc, ai 7 de forá 2017 á la strotöra La Spona fat para ala gara dles liöses a Terenten organisada dai cater salf protezioná de Puster. Diesc assistis á tut pert ala gara y ai é gnüs acompagná da trëi assistënc. Martin, Ivo y Elisa á arjunt le secundo plazamënt y á ciafé la copa. Günther é rové penultim y á porchël ciafé le pest da pozer ciafan na preza cun liagnes sfomiades. Düc i atri partezipanc á podü pié do na medaia. A düc ti al salpü dër bel y s’inconforta bele sëgn ala proscima gara dles liöses.

Jita sön Plan de Corones

Ai 15 de setëmber 2016 sun jüs sön Plan de Corones a ciaré al "Messner Mountainmuseum" y ala ciampana dla pesc Concordia. Chësta jita é gnüda proponüda dai assistis te na sentada de düc y porchël éla jüda da la realisé. Cina sön Ju de Furcia uns tut l’auto y spo le lift che porta sön Plan de Corones. Do la vijita al museo y ala ciampana sun jüs deboriada a marëna tl rifugio iló dlungia. A düc ti al salpü dër bel y de chësc dé ti restaral na bela recordanza.





Fabrich dala lana Hugo Jordan

Ai 10 de má 2016 é jü n grup, fora dla tesciaria y dla stüa da cují dla Spona, a Breitenbach tl Austria a ti ciaré ala fabrich dla lana. Cun chësta lana de cualité fajunse ince nos i tapec a La Spona. I proprietars dla fabrich nes á tut ite dër bun y nes á condüt fora por i locai por nes mostré sciöche al vëgn laoré sö la lana. Denant che jí düc deboriada a marëna nes ái fat odëi süa botëga daolache al ê de vigni sort de tapec metüs fora da vëne. Dales dües domisdé sunse indô piá ia da gní zoruch dl revers de nosta strotöra. Al é sté n de dër interessant por döt le grup che á podü odëi chësta gran fabrich.

Invit da jí sön Boé

Le mercui 30 de merz sun gnüs inviá dala familia Dapunt da jí sö dala ütia de Boé a marëna. Dala mesa les ünesc danmisdé sun piá ia da Pidrô demez, valgügn cun le auto dla Spona, atri cun la coriera, por jí a Corvara a tó l'ovovia che porta sön le Boé. Grana ê l'emoziun da podëi jí cun la coriera mo dandadöt da jí cun les condles sön Boé. De cör giulan ala familia Dapunt por la bona marëna y ala sozieté di lifc por les chertes che ëi á dé cá debann. 

Invit da jí a marëna sö dala ütia "Cir" sö Jú

Ai 23 de merz 2016 é le grup dl salf laur protezioné "La Spona" jü a Piculin por tó l’ovovia che porta sö Jù. Lassö á düc podü amiré la cornisc de munts incëria y les contrades. Do avëi fat n valgügn varesc a pe ánse podü jí ia tla ütia Cir a marëna; chësta s’é gnüda ofrida dala familia de Herbert Videsott a chëla che i dijun de cör giulan. N gran giulan i vá ince a Pepi Dejaco che se á sponsorisé les chertes por le lift.

Festa di lëgns 2015

Ai 27 de má 2015 sun gnüs inviá dala forestala dl post, adöm ala scora elementara da La Val, a tó pert ala festa di lëgns. Al é sté dër n bel de da sorëdl. Ince nösc assistis á podü senté só lëgn y aprofité dla bona aria y dla bela compagnia de düc i scolars da La Val. 

Da La Spona por Striscia la notizia

Sciöche ti ultimi dui agn, á ince en chësc ann indô i assistis dl salf protezioné podü fá para ala trasmisciun „Striscia la notizia“ adüm al „Mago Casanova“. La trasmisciun é gnüda registrada tl salf dles manifestaziuns da La Ila. I assistis é gnüs acompagná dal responsabl dla strotöra y da na assistënta. Düc é gnüs tuc sö dër bun dal strium che se recordâ ciamó avisa l´inom de vigniun, ince sce al é bel passé n ann, dal ultimo iade, ch’ai s´â encunté. Denant co mëte man cun la registraziun, ti á le striun mostré a valgügn assistis l'ert dl striné, dedô ai podü porvé fora i strinac dan la telecamera. Chësc ti á dër plajü, ai ê motivá y al parô che ai fos nasciüs por sté sön paladina. I assistis á ince raprejensté na picia scena da Nadé cun Santa Maria, Sant Ujöp y i famëis. Pudëi tó pert a chësc evënt, che vëgn lascé udëi sura düta la Talia é dessigü stada na beliscima esperiënza pür düc i assistis dla Spona“.

En Nadé, ai 25.12.2014, dales 20.40 vëigun sön “Canale Cinque” chësta trasmisciun, olache an podará ince odëi i assistis dla Spona.

Vacanzes al mer

Deboriada a cëna

De messé é n grup de assistis dla Spona jü adüm a valgügn assistënc y n volontar a Jesolo al mer. Un dormí te n hotel a trëi stëres. Por chi che ne orô nia jí vigni de fora söla spona êl ince la poscibilité da sté tla nodadoia dl hotel. Da sëra unse fat de vigni sort de ativites, sun jüs a balé, al zircus, al cinema 6D. Bel êl ince da ji düc adüm a se bër val' o a mangé n dlacin. Na sëra sunse rodá te cité cun la roda. Un ince fat amizizia cun porsones tl medemo hotel. Al s'á salpü a düc dër bel.

Markus Videsott

Na chidlada deboriada

foto La Spona

Ai 16.04.2014 á i assistis adöm ai assistenc dla Spona da Pidrô invié en grup de ghesć dla Ciasa de Palsa da San Martin da jí empara a fá na chidlada deboriada tla chidlara da Runcac a Al Plan. Düc adöm s’á devertí dassënn.                             Al é sté na iniziativa dër plajora co gnará porchël fata ince endô en ater iade pa val’ ocajiun.

Foto La Spona

Jita sön Fanes

Le grup dl salf protezioné á azeté atira le invit da pert dl comitê dl K.V.W. d'Al Plan pur jí impara sön Fanes. N grup é jü da Pederü sö cun le iat dala nëi, i plö sportifs é jüs sö a pé.  Al ê ai 25, n bel de de merz, la contrada novüda pro trasmetô pêsc y armonia. Na vijita te capela ne podô gnanca falé. Dô ch' un albü marné in compagnia tla ütia da munt „Lavarella“ unse fat n bel rait cun la liösa indô zoruch tla val.

Giulan de cör dl invit, al é sté bel.

foto La Spona

Na scincunda da Nadé particolara (19.03.2014)

Do na vijita al marcé da Nadé nes á Augustin y Jolanda Clement invié sö Ju a marëna. Ai 18 de merz era spo stada tan inant. Cun les chertes che Pepi Dejaco nes á metü a desposiziun sunse jüs sö Ju cun l' implant portamunt Piculin-Ju. Ruvá sö, á düc podü amiré i bi crëps curîs de nëi che ti fej da cornisc ala bela tëmpla da Jù. Incër les dodesc gnô la fan grana y an tofâ bele n bun tof da pizza. Pro la ütia de Augustin á düc podü se mangé la pizza che ti savô buna. Dedô âl dé ca na bela sbalinada y düc se á devertí tiran y se ciafan cotan de nëi. Le tëmp é passé dër snel y defata el sté indô da gní de revers dla "Spona". A düc chi che á porté pro che chi dla "Spona" podess passé n te bel de oressun ti dí de cör en gran dilan.

Jöbia grassa ai 27 de forá 2014

foto La Spona

N chësc ann á i assistis dla „Spona“ da Pidrô, acompagná da sü assistënc y da sües assistëntes, passé la jöbia grassa sön Piz Sorega.

I sun bele piá ia dadoman por rové spo sö S.Ciascian olach’ i sun jüs cun l’implant portamunt fina sö Piz Sorega. Dailó unse podü nes gode na contrada de morvëia. Por en valgügn dl grup é sté chësc n momënt dër particolar, acompagné da n gröm de emoziuns. Dedô se á le grup despartí; en valgügn é jüs a fá na bela spazirada tratan che i atri á albü l’ocajiun da fá n bel rait jö por la pista „Foram“.

Do avëi passé le danmisdé a na mainira ativa y sana for tl’aria frësca unse azeté cun plajëi l’invit da jí a marëna tla ütia „Piz Sorega“. N bel dilan ti va ai proprietars.

Do marëna se á le grup indô despartí. En valgügn é jüs de revers a S.Cascian cun l’implant portamunt y i atri ne aspetâ nia l’ora de podëi ciamó se fá n ultim rait cun la liösa y stlü jö ensciö chësc bel de deboriada.

Dilan ince ai gesturs dl implant portamunt de nes avëi lascé jí sö y jö debann.

Gran chidlada di salfs de laur protezioné dla comunité comprensoriala dla Val de Puster

L' ativité sportiva é na cossa fondamentala por stimolé l' integraziun soziala. Le salf de laur protezioné "La Spona" da Pidrô á organisé l' prüm tornê da chidlé, ai 23 d' otober tl' ostaria "Riposo al Bosco" a Al Plan de Mareo, n' esperiënza nöia y plëna d' emoziuns. A chësta ativité á tut pert i cater salfs de laur protezioné dla Val de Puster, ola ch' al fej pert le grup "Bidenegg" da Toblach, le grup "Trayah" da Bornech le grup da Türesc y le grup dla "Spona" da Pidrô, che á organisé l' evënt. I cater grups, vignun formé da set assistis y da dui acompagnadús á motü man la gara. Tratan che la motivité y l' ambiziun di sogadús chersciô tres de plü, ne falâ nia le entusiasm da pert di spetaturs.  Vigni grup á dé le plü de sè instëss, y al é sté en bel divertimënt che á rendü le tornê plü interessant. Do en gran sforz y impëgn da pert di chidladús, á le grup "La Spona" davagné cun 251 chidli dan dal grup "Biedenegg" da Toblach cun 247 chidli, dal grup "Trayah" cun 218 chidli y dal grup da Türesc cun 194 chidli. L' miú chidladú dl dé é sté Guido Sottara da La Val cun 53 chidli.

Jita a Maran a ti ciaré ai Urc de Trauttmansdorff

Gita del laboratorio protetto „La Spona“ ai Giardini di Trauttmansdorff

Il martedì mattino del 4 giugno 2013 siamo partiti con due pulmini da Pederoa verso Merano. Il tempo era stupendo. Arrivati nei pressi di castell Trauttmansdorff abbiamo fatto i biglietti d'ingresso e poi siamo entrati nei giardini di Trauttmansdorff. Sui pendii si snodava un sentiero. Lungo il sentiero del giardino si vedeva  il falso gelsomino e il caprifoglio. Sui prati crescevano papaveri, uva e ogni varietà di fiori .Poi ci siamo incamminati verso il sentiero panoramico e verso la voliera. Nella voliera cerano due pappagalli. Una passerella sospesa nel vuoto ci à offerto panorami sui monti circostanti e sulla città di Merano. Verso mezzogiorno abbiamo fatto picnic vicino al lago delle ninfee. Nel laghetto vivono tanti pesci. Vicino alla statua di Sissi  abbiamo scattato una foto di gruppo, poi abbiamo visitato il Touriseum. Nel castello ci sono le sale dedicate a Sissi.

Per me è stato molto bello vedere tante varietà di fiori e spero di poter ritornare ancora una volta a visitare questo bell giardino.

Guido Sottara    (assistito del laboratorio protetto „La Spona“)

Jita sö La Crusc

Ai 5 de merz 2013 é l'grup dla "Spona" jü cina sön Badia por tó l'lift che porta sö La Crusc. Rová sö La Crusc sun jüs te dlijia a dí sö n'oraziun y a cianté val' ciantia. Dedô sun stá inviá ia dal Erwin y dala Pia a marëna. Ai se á arjigné na pasta, n bun pössl cun śulza, l'dessert y ince l'café. Dô marëna á düc tut indô l'lift che s'á porté jö a val. Al Erwin y ala Pia ti dijun nos dla Spona de cör giulan. Giulan ince al ombolt de Badia Iaco Frenademetz che s'á lascé jí debann cun l'lift.

 

Festa di jüc y dl sport 2012

 

Ince en chësc ann, ai 16.05.2012, éle gnü organisé, da pêrt dla scora pur profesciuns soziales “Hannah Arendt“ y dala assoziaziun dla “Lebenshilfe“, la festa dl sport y di jüc a Kaltern. I assistis dla Spona á tut pêrt cun entusiasm a tröc jüc de aziun y abilité y ince a d’ atres disciplines schiöche: salté (50m), trá l vortex y tra la corda, olache ai á arjunt l pröm post. Por düc chi che ne á nia tut pêrt ales gares éle gnü pité ativites creatives desvalies y de intrategnimënt.

Via Crucis

I jogn dla Spona stá adöm a lauré, a se devertí, mo ince a perié. Ai 29 de merz 2012, la jöbia dan l’edema santa, se á abiné i jogn dla Spona cun só acompagnadus a dí les staziuns. Düc chi che orô ê inviá a tó pert.

Jubileum dl salf protezioné da Pidrô

Ai 7 de otober 2011 á le salf protezioné da Pidrô festejé i 25 agn de ativité. Por chësc avenimët él gnü organisé n bal tl salf dles manifestaziuns a San Linert. Le comun de Badia nes á motü a desposiziun l salf debann, de chësc i dijun n gran giulan al ombolt Iaco Frenadenetz. I invic é gnüs realisá da Dumëne Comploi, i dessëgns él sté i assistis dla "Spona" che á fat. I cosć por stampé i invic é gnüs surantuc dala cassa Raiffeisen dla Val Badia, che nes dëida dagnëra canch'i adorun valch. Por la organisaziun dl bal se á cruzié Konrad y Robert. Franz Posch y só grup nes á acompagné tratan la sëra cun de bela musiga. La serada é gnüda moderada dal dot. Lois Ellecosta. Por fá garaté la prejentaziun di assistis y por la daurida dl bal á fistidié la maestra Cristina Rubatscher. Por vigni assistí y por vigni assistida él gnü chirí fora na balarina o n balarin. Ringraziun la Cristina, dütes les balarines y le balarin. Por la buna cëna á ponsé Arthur Frenes dl Hotel Posta cun sü colaboradus y sües colaboradësses. Nicòle y Annelies á partí ite i posć da senté jö y á fistidié por la decoraziun. I assistënc dla "Spona" y ince volontars se á motü a desposiziun tratan les vacanzes da d'isté por rové da fá i invic y i prosc. Ringraziun Taxi Richi, les assistëntes dl salf protezioné da Toblach, Hans Kirchler, i stödafüch de Badia y Luis Lerchegger por süa desponibilité. Tratan le bal él gnü incoroné la reìna y le re dl bal. Le plü rises á ciafé Elisa Crepaz y le plü prosc Arnold Willeit. Düc á podü festejé te na bela atmosfera y chi dla "Spona" ponsará ciamò gonot zoruch a chësc bel avenimët. I colaboradus y i assistis dla "Spona" rengraziëia de cör düc chi ch'é gnüs a fá festa cun nos y ince düc chi che á ciamó a val' maniera porté pró a fá garaté le iubileum.      

 

Fi d'orientamënt La Spona

Botëga nöia tla ciasa "La Spona"