Festa di lëgns cun i assistis d’La Spona

Ai 20 de jügn 2013 él gnü t’La Spona a Pidrô l’verdabosch Patrick a se cuntè dla natöra y dles roes. Al nes é gnü spieghé tan important che al é da sconè la natöra por avëi ega nëta. Dedô sunse jüs te bosch a sentè valgügn lersc. Al é stè bel da jì fora tla natöra y i se an bel dî confortè a chësc bel dé.

I assistis Guido y Ivo

Invit da jì sön Boè (02-04-2014)

foto La Spona

I ne essun nia podü damanè plö en bel dé por ji sön Boé, olache la familia Dapunt nes à invié. Le iade cun le lift à portè a valgügn de gran emoziuns, sides por l´ altëza che por le panorama. Sö insom, se aspetâ na bela roda a pé sot al sorëdl y dedô na bona marëna te ütia, ofrida dai proprietars. Ad ëi y ai chi che se à metü a desposiziun le lift ti dijunse ćiamò n iade dër bel giulan.

Invit a na bona marëna tla ütia "Cir"

Ai 20 de merz 2013 é le grup dl salf laûr protezionè "La Spona" jü a Picolin por tó l’ovovia che và sö Jù. Lassö à düć podü amiré la cornisc de munts incëria y les contrades. Dô avëi fat n valgügn varesc a pé ùnse podü jì ia tla ütia Cir a marëna; chësta s’é gnüda ofrida dala familia de Herbert Videsott a chëla che i dijun de cör giulan. N gran giulan i và inće a Pepi Dejaco che se à sponsorisé les chertes por le lift.

Plata soziosanitara 26 de otober 2012

 

Le grup dl „KVW“ d’ Al Plan inviëia i jogn dla Spona a na jita te Fanes

Ai 14 de merz 2012, n dé de sorëdl y dal’ aria ćialdina, à podü i jogn dl Salf de laûr protezionè La Spona, sö invit dl KVW d’Al Plan, jì sö la munt de  Fanes. N giat dala nëi a 15 posć à portè na pert dl grup ćina sö la ütia Lavarella. Valgügn é jüs sö a pé. Dô avëi mangé de fora, sö la teraza dla ütia, é le grup pié jö cun la liösa dl vers de Pederü.
Dër n bel giulan ai volontars dl KVW d’ Al Plan.

Festa da carlascè 2012

En jöbia grassa domisdé él gnü fat festa da carlascè tla ćiasa “La Spona” a Pidrô. Por le avenimënt êl inće le bar de ćiasa davert cun vigni sort de duciaries. I assistit à daorì la festa cun n bal. Ai se à  prejentè al publich ti costüms fać da ëi instësc. Da pert dl grup dl teater da La Plì él gnü portè dant val’tòch da rì. La festa é gnüda abelida cun i orghi da man. Tröpa jënt à tut pert ala festa, inće le diretur Gebhard Mair y n grup de assistis dl Trayah da Bornech è gnüs te chësta ocajiun adalerch. Da pert de chi dla „Spona“ val n gran ringraziamënt a düć chi ch’à daidé y a düć chi ch’à tut pert a chësta festa.

 

Invit a marëna sö dal Sciadà

L’lünesc ai 12 de setëmber 2011 è düć chi dla Spona gnüs invià dala assistënta Nicóle sö dal Sciadà a Calfosch a marëna. Sun gnüs tuć ite sciöch’i plö gran sciori y l’cogo nes à vizié cun na boniscima marëna. Un podü passè düć adöm n bel dé y dô marëna à la ustira arjigné ca por nos la tombola y trëi assistis à podü pié dô de bì pesć . Oressun ćiamò ringrazié la Valeria y la Nicóle por düt ći ch’ëres à fat por nos, al è stè dër bel.

Jita te Fanes

La jöbia, ai 15 de setëmber 2011 é jü l'grup de "La Spona" a fà na jita te Fanes. L' ustì jonn dl Hotel Posta da Pidrô se à tut dlaorela da gnì cun nos. Cun sò auto a nü posć di soldas al condüt valgügn assistis y assistënć te Fanes. Por chisc él stè n aventöra nöia, ćiodì che l'auto scassâ cotan ia y ca.  I mius da jì a pé, denanche rovè sö te Fanes, é gnüs fora de auto por jì n tòch a pé. Dô che an ê stà tla pićera capela a perié y a ćiantè, sun jüs ia tla ütia "Lavarella" a marëna. L'tëmp ê stè dër bel, al dê sorëdl y al ê bun ćialt. Amesa i curusc dla natüra, che ê ćiamò dër da d'isté, y cun l'sonn dles ćiampaneles dles vaćes, sun pià indô zeruch direziun Pederü. Al é stè por düć dër n bel dé.

 

Jita a Desproch di assistis y colauradus dla „Spona“

 

En gaujiun dla festa de iubileum di 25 agn dl salf protezionè da Pidro à la Comunité Comprensoriala dla Val de Puster surandè ai assistis y colauradus dla „Spona“ en bonn por na jita de en dé. I assistis à chirì fora da jì a ciarè ala coraria dles ćiampanes „Grassmayr“ y al „Alpenzoo“ a Desproch. En mercui, ai 09.05.2012 él finalmënter gnü le dé a chël che düć s’à bel dî enconfortè. Sun pià ia da Pidrô dales 08.00 cun la coriera de Taxi Vico. Dô na cürta palsa söl’autostrada sunse jüs inant ćina ala coraria dles ćiampanes. Dailò sunse gnüs menà fora por la ćiasa da na porsona competënta, che nes à cuntè daimproìa sciöche al vëgn fat da corè na ćiampana. A düć ti ál salpü dër interessant. Dedô à ćiamò vignun podü se cumprè na pićia recordënza tla botëga de ćiasa. A marëna sunse jüs te n restorant cineje, daolach’ vignun à podü se chirì fora pro le bufé ći ch’al orô. Domisdé ê sön le program la vijita al zoo. Ćiodì che al n’ê nia poscibl da jì cun la coriera ćina dan le zoo, sciöche al ê preodü, él gnü massa tert por jì sö a pé y insciö unse sburlé la vijita al zoo a en ater iade. Denant co jì a ćiasa unse ćiamò fat na roda te cité. Incër les cinch domisdé sunse rovà indô derevers a Pidrô. I assistis y i colauradus dla „Spona“ rengraziëia la Comunité Comprensoriala dla Val de Puster por le bel dé a Desproch. Al ti à salpü a düć dër bel.

Novitês sön le transport da Taxi por porsones sön scagn a rodes tla Val Badia

Da otober dl 2011 incà à le sorvisc da taxi de Ricki Ploner da Pidrô adegué so auto por trasportè porsones sön scagn a rodes. Les porsones pò gnì trasportades te sò scagn che vëgn fissé te deplü punć dl auto. Cun chësta novité y comodité pol gnì menè porsones ti zëntri soziai, dal dotur o che jiss ion a se fà na jita y che denant ne â degöna poscibilité da fá chësc por gauja de sò handicap.

Na jita sön la nëi de Piz Sorega

I assistis y i assistënć dla Spona é stà invià ai 30 de jenà 2013 da jì sön Piz Sorega a jì cun la liösa y a marëna. Al é stè n bel dé por i assistis che à podü amiré la bela contrada y se gode la bona aria dles munts. Le grup dla Spona oress de cör rengrazié le volontar Iarone Chizzali, le proprietar dl lift Carlo Canins cun süa fomena Waltraud y le patrun dla ütia “Piz Sorega” Andrea Tasser cun süa fomena Brigitte che ti à metü a desposiziun le lift y la marëna debann.

La trasmisciun "Striscia la notizia" é gnüda a La Spona a filmé! En Nadè da sëra dales 20.30 dô l'notiziar vëigon chësc sön "canale cinque"

En mertesc danmisdé, ai 4 de dezëmber él gnü te nosta strotöra la trup che laóra por la trasmisciun "Striscia la notizia" por tó sö val' stligüć de film. Al ê gnü para n strinadù che ti fajô dant valgügn strinać ai assistis y döt chësc gnê tratan filmé. I assistis se lasciâ gian filmé y fajô para döt ći che ti gnê dit.

Gara dles liöses a Terenten

Ai 08 de forà 2011 él gnü organisé da pert dla Comunité Comprensoriala dla Val de Puster na gara dles liöses por porsones cun handicap. Inće l’grup d’La Spona da Pidrô à tut pert a chësta gara y por se arjigné cà bun ési jüs bel les edemes da  denant da La Val sö a porvè fora les liöses. La gara é gnüda tignida a Terenten y ala ê partida ite te cater categories: ëres con acompagnadù, ëi con acompagnadù, ëres da sores y ëi da susc. An pò bëgn dì che i assistis â na gran vöia da lascè jì la liösa por podëi se davagné na copa. Bëgn trëi à podü pié dô na copa: Martin Crazzolara da La Ila, Elisa Crepaz da San Ciascian y Ivo Irsara de Badia. Al ne à nia manćé ala fin dla gara val’ de bun da mangé y de bela musiga da balè.

I assistis se arjigna da pié ia
Günther rüva al travert
Elisa, Martin y Ivo cun les copes

Vacanza al mer 2010

N grup de set assistis, acompagnà da trëi assistënć y na volontara, é stà dai 16 ai 24 de messè 2010 a Jesolo a passè na vacanza al mer. Le grup à sojornè te n Hotel a trëi stëres diretamënter dan l'mer. I assistis se à integré dër bun cun i atri ghesć dl Hotel y an pò dì che al é inće nascü val' amizizies danter assistis y personal dl Hotel. L'bel tëmp à impormetü al grup da jì vigni dé sön la spona dl mer. N dé é jü l'grup dla Spona tl zënter de divertimënt Aqualandia y n ater dé a ti ćiarè ai tiers tl zoo de Lignano. Da sëra êl da jì a fà na roda fora por les strades de Jesolo por ti ćiarè ales botëghes y a se bëre valch por se parè la  sëi che an ciafâ canch'al ê dër ćialt. N laûr che düć messâ fà plö iadi al dé ê chël da se lavè y da se mët sö crem da sorëdl. Düć é stà contënć y spera da podëi passè ćiamò n iade na vacanza al mer.

Jesolo 2010
Arnold
Patrick
Markus ti dà na scincunda ala patrona
 

Fi d'orientamënt La Spona

Botëga nöia tla ciasa "La Spona"